Poi kodai

Lamo atok tak becito kek sini yo tak? bukan po, atok bizi.. cemacam kojo nak buek, tambek lombu, motong, kutip sekerap, timbo kolam, carik pucuk paku, tobeh lalang, komeh ghumah.. masak pon atok buek.. uwan kau? uwan kau takdo sini.. dio poi kojo kilang nun. tinggal la atok sorang sini ha..

nia nak cito tadi atok poi gunting ghambut.. poi la atok kek kodai gunting tu naik kancil.. nak nek moto tak sodap lak ghaso eh.. mano tak eh.. kok ado anak dagho lalu lalang kang buleh tinn.. kok nek moto, nak tinnn kepebondo eh, dah tak bedocit lagi honn ehh tuh.. kekadang tuh dah lopeh lalu baru la kuar hon ehh.. agak eh kok eksiden, atok dah dalam kubur baru hon eh bebunyi..

apo pulak cito hon kan.. nak cito pasal kodai gunting..

lapeh jo atok buek reverse parking kek dopan kodai tuh, atok pon masuk lah.. dok kek ateh sopa.. ado majalah bola, atok capai la, nak baco.. ntah pobondo tulih eh.. tak paham atok do..

ghamai yo oghang kek kodai tuh... sumo heboh nak buek stail rambut ronaldo.. den tengok rambut eh tuh takdo la lawa bona.. sobab dek idung eh mancung tuh jo yang buek an dio lawa.. yang idung macam pelopah kelapo tuh, sodar-sodar lah sikit yo.. buek yo la style mao zedong tuh..

tibo la giliran atok..

"nak buek style ronaldo ko tok?"

langsung atok jawab..

"hayah kau"

langsung tediam dehh..

dio gunting la ghambut atok style beso..