Selemo Babi

"Jejago!! ditebong dek minatang nih kang, payah pulak nnt."

Setakat nih selamo post neh ditulih, da ado lapan orang meninggal kek Malaysia dek selemo babi yang melampau da toghuk ehhhh tuh.. Kesian botol. Kito kono la bejago jago. Jago kesihatan elok-elok. Tak sepo yang dapek terkecuali daghi disoghang dek penyakit yang menular kek seluruh dunio neh.. Sumo ado probability untuk kono..

Mungkin ini ujian daghi tuhan yang nak menguji kesabaran hambo-hambo eh. Tapi sejauh mano kito besedio untuk menompuh ujian tuh, kito kono la kaji sendri.

Nih ado sikit nasihat dari Dato' Panglimo Bukit Putus,

Sentiaso basuh tangan tiap kali nak mentedaghah. Bebudak skang nih bukan kigho eh do, ghabo itu ini, colek idung, lopeh tuh capai kue apam ateh mejo, tolan.. Bukan dikigho eh do.. mano inti kacang, mano taik idung, tak dikesah eh do.. janji sodap. Patut eh, basuh tangan bosih-bosih.. baco bismillah, baghu makan..

Elak an sontuh muko, mulut dan idung dengan tangan. Yo la, virus tuh tersebar ikut angin, kok kono mondo tuh melokek kek muko, peh tuh kau ghabo, peh tuh makan kue keripap.. infected la sudah eh.. sepo yang ado jerawat tuh, ghonti an daghi memicit jerawat tuh.. kekadang tuh tangan eh tuh ghonyammm yo nak micit jerawat.. kek dalam bas pon nak micit jugak.. osah angin eh den..

Elak an daghi poi tompek-tompek ghamai oghang. Kau da tau selemo, batuk, jangan la gatal pulak nak poi shoping. Dengan selemo meleleh eh tuh, nak yo poi jenjalan lagi tuh.. Duduk la umah ontok-ontok kan elok.

Pakai la mask tuh selalu maso kuar jenjalan.. Nih la maso eh nak jimat lipstick atau fondation, atau ubek gigi.. Sumo buleh sembunyik balik mask..

Dan paling ultimate sekali, kok ghaso da domam tuh, poi jumpo doktor dogheh.. kau jangan da telontang ateh katil mengigil-gigil, banghu tehegeh-hegeh nak poi jumpo doktor.. ingat, kesihatan tak buleh nak dijual boli, jago la mano yang ado nih..

" Sekian nasihat daghi tok panglimo.. ado maso, jumpo laie~ " pics from tuya