Sunday, September 13, 2009

Pantun : Raya

Memandangkan rayo da dokek bona nih ha.. Atok nak kasi la sikit-sikit pantun murah atok yang atok karang maso darjah duo kek sekolah kebangsaan Dato Abdullah, gemoncheh, negeri sembilan.


Poi kobun tanam halio,
Tanam halio sebolah kepayo,
Bulan Syawal bulan mulio,
Moh sesamo raikannyo.

Poi jumpo oghang semondo,
Ghumah eh tinggi banyak tanggo,
Bilo melahap biala bepado,
Sebolum sakit kono bejago.

Membuto pagi sampai ke potang,
Ateh bantal ponuh poto,
Barang yang lopeh jangan dikonang,
Elok bemaaf sesamo kito.

Gunung Angsi tompek betapo,
Betapo sambil makan roti,
Duit ghayo jangan dilupo,
Poghut konyang suko ati.

Naik moto takdo lesen,
Bawak laju macam hantu,
Kok duit ghayo pon boghi sepusen,
Memang dasar kepiting batu.

Poi zoo dengan boyo,
Boyo pandai kupik kelapo,
Behati-hati maso berayo,
Selemo babi jangan dilupo.

Makan biskut selet kaya,
Petuo untuk jimat cermat,
Behati-hati dijalan raya,
Pandu cermat jiwa selamat.

Poi kenduri awek cun,
Parking moto dalam bangsal,
Jangan mengado nak main morcun,
Putuih tangan baru nak nyosal.

Ari-ari kono lompang,
Jatuh tegolek ateh tanah,
Kalo ado maso yang lapang,
Moh la jomput ke rumah.

Poi bekubang dalam payo,
Sambil mengoca ikan ghuan,
Bulan Syawal bulan bahagio,
Selamat ari rayo ese ucapkan.


SELAMAT HARI RAYA
MAAF ZAHIR & BATIN
JEMPUT LA DATANG KE RUMAH


daripada warga senapang patah:

-Kaloi-Atok-Auntie Rozy-Dato' Panglimo Bukit Putus-Leman Tungal-





3 tembakan:

  1. Mysterious Lady ( September 13, 2009 at 10:40 PM )

    Hahahahaha! Terbaik Keroll!!
    Selamat Hari Raya =)
    Maaf Zahir Batin.
    Datangla rumah.

  2. Kaloi ( September 15, 2009 at 12:09 AM )

    meh datang umah den jugak..

  3. teddybiegirl ( September 16, 2009 at 1:07 AM )

    perrghhh...
    lawak jer pantun ekau..
    hehehe...
    bg la kat pak cu..